BUTUAN CITY – Hugot nang pabantayan ni Maibu Brgy. Kapitan Junie Tiempo ang portion sa Purok 8 diin natigayon ang pagdahili sa yuta nga mikalas og usa ka kinabuhi samtang swerteng nakalingkawas ang laing tulo niini ka mga silingan kagahapong adlawa
Naila ang namatay nga si Dionesio Taghap, hingkod ang pangidaron ug mulupyo sa Purok 8, Brgy. Maibu ning siyudad.
Sigon ni Kapitan Junie Tiempo, dugay nang gidili sa ilang barangay ang pagbiling-biling kon ginagmay nga pag-ayag og bulawan sa maong lugar apan duna gihapo’y magtago-tago paghimo niini aron duna’y magamit sa pagpalit og tambal, bugas ug inadlaw nga panginahanglanon.
Giklaro ni Kapitan Tiempo nga ang parte sa pangpang diin natigayon ang pagdahili sa yuta, igo lang gipahulayan sa biktima uban sa iyang mga silingan kansa humok na hinungdan nga dihang nabug-atan, mibigay na.
Nakadagan matud pa ang tulo apan na-abtan gyod sa midahiling yuta ang biktima kinsa natabunan ug dihang nakabutan, gidala gilayon sa ospital apan wala na maka-abot pang buhi.
