BUTUAN CITY – Usa ka sundalo ang patay samtang usa ka Civilian Active Auxiliary kon CAA membro ang angol human sila gibanhigan kaganinang alas-sais sa buntag sa may Sitio Dagnasay, Barangay Puting Bato, Cabadbaran City, Agusan del Norte.
Naila ang namatay nga si Sgt. Darry Jay Aguirre Rivera samtang ang angol nailang si CAA member John Odon, parehong sakop sa 29th Infantry Battalion, Philippine Army.
Base sa report nga nakuha sa Cabadbaran City Police Station, nakadawat sila og tawag gikan sa 29th Infantry Battalion kalabot sa natigayong pagpamanhig kondiin daling gidala ang mga biktima sa Cabadbaran District Hospital.
Migawas sa insiayl nga imbestigasyon nga sakay ang mga biktima sa usa ka motorsiklo padulong unta sa ilang detachment apan pag-abot nila sa dapit nga nahitabuan, lima ka mga tawong gitu-uhang sakop sa Sandatahang Yunit Pangpropaganda kon SYP 21C nga gipangunahan ni Ka Dindo ang mitiro sa mga biktima hinungdan sa ilang nadangatan.
Narekober sa dapit nga nahitabuan ang duha ka mga buhing bala sa 7.62 rifle; tag-usa ka gitira nang cartridge case sa 5.56 ug 7.62.
