BUTUAN CITY – Gimando gilayon ni Brigadier General Maurito Licudine, ang commander sa 402nd Infantry (Stingers) Brigade, Philippine Army ang paglusad og massive manhunt operation batuk sa nanibat nga mga rebeldeng Communist Party of the Philippines-New People’s Army kon CPP-NPA human ang engkwentro nila tali sa tropa sa 58th Infantry (Dimalulupig) Battalion ning mi-aging alas-12:50 sa hapon didto sa lasang sa Sitio Mangilet, Barangay Bal-ason, Gingoog City, lalawigan sa Misamis Oriental.
Sigon ni Licudine, gitisukan sa mga rebelde og pagpanghasi ang maong lugar pinaagi sa pagpangilkil og kwarta ug pagkaon ngadto sa mga sibilyan aron lang sila mabuhi.
Mukabat sa 20 ka mga rebeldeng gitu-uhang sakop sa Guerrilla Front (GF) 4B sa North Central Mindanao Regional Committee (NCMRC) pagpanguna ni Ka Patrick ang na-engkwentro sa operating troops sa 30-minutong binakbakay.
Daling gi-abandona sa mga rebelde ang ilang posisyon ug misibat binilin ang usa nila ka namatay’ng ka-ubanan ug gitu-uhang gibitbit nila ang ilang mga samarong ka-ubanan base na usab sa dugo nga anaa sa dapit nga nahitabuan ug sa ilang gisibatan.
Narekober gikan sa encounter site ang usa ka M14 rifle, usa ka anti-personnel mine (APM), usa ka 50-meter wire, 3 ka magazines sa M14 rifle nga duna’y mga bala, usa ka Baofeng radio, usa ka solar charger ug nagkada-iyang medical paraphernalia.
Nasayrang naglusad og combat operations ang mga elemento sa 58IB dihang nakadawat og mga reports gikan sa mga residente kalabot sa presensya sa mga rebeldeng planong maglusad og conduct harassments ug extortion activities.
