BUTUAN CITY – Usa ka rebeldeng New People’s Army kon NPA ang patay samtang duha ka mga armas ang narekober human ang 30-minutos nga engkwentro tali sa pwersa sa gobyerno ug sa mga rebelde kagahapon sa Sitio Banal, Barangay Magsaysay, lungsod sa Prosperidad, Agusan del Sur.
Naila ang napatay nga si Arnel Dator, alyas “Darwin,” sakop sa Sub-Regional Sentro de Gravidad (SRSDG) Southland, Northeastern Mindanao Regional Committee (NEMRC) kinsa gibiyaan sa iyang mga ka-ubanan human na-engkwentro ang mga sakop sa 44th Division Reconnaissance Company, 4th Division Reconnaissance Battalion, ilawom sa operational control of the 401st Infantry “Unite N’ Fight” Brigade.
Gitugyan na ang patay’ng lawas sa rebelde ngadto local government sa Prosperidad, alang sa tukmang disposasyon.
Narekober usab sa kasundaluhan sa encounter site ang tag-usa ka M16 rifle, AR18 rifle, backpacks, usa ka bandolier, ug mga subersibong dokumento ug natugyan na sa mga hingtungdang ahensya alang sa dugang imbestigayon.
Natigayon ang engkwentro human girespondihan sa mga sundalo ang taho sa mga residente kalabot sa gihimong pagpangilkil sa grupo ug uban pang mga kalihukan nga nakabalda sa komunidad.
