BUTUAN CITY – Gidala na sa Department of Health kon DOH-Caraga Regional Office ngadto sa Southern Philippines Medical Center kon SPMC sa Davao City ang swab samples nga gikuha gikan sa upat ka mga Cabadbaranons nga nagpositibo sa COVID-19 human napa-ilalom sa rapid anti-body tests ning mi-aging adlaw ug kagahapon.
Sa eksklusibong pakighinabi sa Bombo Radyo Butuan, gipadayag ni Roselyn Exaure, tigpamaba sa Cabadbaran City government, nga ang upat gilangkuban sa usa ka medical frontliner ug tulo ka mga sabungerong mitambong sa 6-cock derby sa Davao City.
Gibutyag sa opisyal nga wala’y angayang kabalak-an ang ilang katawhan tungod kay ang maong mga resulta subject for confirmation pa sa SPMC.
Gidugang sa opisyal nga dihang unang mibuto ang balitang duna’y mga nanabong sa Davao City nga nagpositibo sa COVID-19, ila gilayon kining gipa-trace ug gipa-ilalom sa 14 ka adlaw nga home quarantine hangtud nga gipagawas ilabina kadtong wala’y mga simtomas.
Human sa incubation period, gi-isolate na ang uban hangtud nga napa-ilalom sa rapid test ug gibalik na pag-quarantine.
