BUTUAN CITY – Usa ang angol human gilamoy sa dako nga kalayo ang gibana-banang 30 ka mga balay nga parehong gama sa mga light materials kaganinang buntag didto sa Baybay, Magallanes, Surigao City.
Migawas sa inisyal nga imbestigasyon sa Bureau of Fire Protection kon BFP-Surigao City, nagsugod pag-ulbo ang kalayo sa panimalay ni Salvacion Paraguya, 60 anyos human niini nalimtan pagpalong ang niluto gamit ang butane stove ug tungod sa kapaspas sa panghitabo, nalatayan og kalayo ang biktima hinungdan sa na-angkon niining pipila ka paso sa iyang lawas resulta sa iyang pagka-ospital.
Padayon pang gisuta sa mga otoridad ang posibleng gibiling damyos sa sunog nga naka-apekto sa gibana-banang 40 ngadto sa 50 ka mga pamilya.
Nakontrola ang sunog pasado alas 8:15 hangtud nga hingpit kining nadeklarang fire out pagka-alas 9 kaganinang buntag.
Nag-andam na usab og ayuda ang lokal nga kagamhanan sa Surigao City alang sa mga apektadong pamilya.
