BUTUAN CITY – Ilubong karung adlawa ang usa ka bulan nga batang lalaki human kini nakabsan sa kinabuhi samtang anaa sa evacuation center sa Libertad Central Elementary School sa Barangay Libertad ning siyudad sa Butuan kagahapong adlawa.
Nasayrang namakwit ang pamilyang Omaña, residente sa maong dapit, sa nakalabay nga adlaw human nabahaan ang ilang pinuy-anan tungod sa padayong pag-ulan nga hatud sa Low Pressure Area.
Sumala sa amahan niining si Carmelo Omaña, nga wala silay nabantayan nga dunay gipamating sakit si Baby Christian hangtud kagahapon sa kaadlawon sa dihang nakita nalang nila nga dunay dugo nga migawas sa ilong niini.
Daling gidala ang bata sa Agusan Del Norte Provincial Hospital apan gideklara kining dead-on-arrival sa attending physician.
Nasayran usab nga 7 months pa ang biktima sa dihang gipakatawo ang biktima.
Sa karun, padayon pang gisuta kung unsa ang hinungdan sa kamatayon niini apan duda sa pamilya sa biktima, nga tungod kini sa pulmonya.
