BUTUAN CITY – Gilaumang sibling magkorum karong adlawa, Lunes, ang mga Sanguniang Panlalawigan Members sa Surigao del Norte arun madesisyonan ang State of Calamity sa Siargao island ingon man sa mga lugar nga apektado sa labad nga blackout tungod sa pagka tangdog o pagkaputol sa underwater cable sa Siargao Electric Cooperative kon SIARELCO kansa maoy dalan arun mosiga ang sugang dagitabnon sa maong lugar.
Sumala ni Surigao del Norte Board Member Atty. Victor Bernal nga subli na usab nga magtapok ang mga membro sa Sangguniang Panlalawigan karong adlawa sa Surigao del Norte tungod kay wala man sila matapok tanan niadtung nakalabayng Sabado, arun unta hisgutan ang State of Calamity sa Siargao.
Subay sa balaod, dili pwede nga magpagawas ang usa ka lokal nga pangamhanan sa ilahang calamity funds kung dili pa madeklara ang State of Calamity sa maong lugar.
Dugang ni Bernal nga anaa matud pa karon ang Surigao Del Norte sa ipit nga sitwasyon, tungod kay gusto matud pang tabangan sa pangamhanan ang mga katawhan sa Siargao, ilabi na kadtung mga apektado sa lapad nga power outage sama sa mga buhatan sa negosyo, ingon man sa ilang turismo, apan dili nila kini mahimo tungod kay wala may otoridad nga mohimo niini.
