BUTUAN CITY – Gikinahanglan karun sa Department of Education kon DepEd-Caraga Region ang dali ug koordinado nga paglihok aron matubag ang kakulangon sa mga tunghaan sa rehiyon.
Kini human nasuta nga adunay 588 ka classrooms nga gikinahanglan og repairs sa tibuok rehiyon human nadamyos tungod sa linog ug nadugangan pa tungod sa pagkuso-kuso sa mga bagyong Tino ug Uwan sa Dinagat Islands ug Surigao del Norte.
Sumala ni Department of Education kon DepEd Caraga Spokesperson Pedro Tecson, sa pagkakaron nagpahigayon na sila og coordination meeting tali sa mga opisyales sa DepEd-Dinagat division aron mapangitaan dayon og solusyon ang kadaot ug kakulangon sa mga tunghaan nga naka-apekto na sa pagtuon sa mga estudyante.
Base sa datos nga gikuha gikan sa Department of Public Works and Highways kon DPWH, ang estimate nga budget alang sa reconstruction mokabat og 2.3 billion pesos.
Gipadayag usab ni Tecson nga gipaningkamotan karon sa DepEd Caraga nga ma-secure ang maong pondo samtang giplano na usab sa mga engineers ang proseso sa reconstruction, lakip ang bidding ug pagpangita og mga contractor nga andam motabang sa proyekto.
