BUTUAN CITY – Mawad-an og komunikasyon ang mga astronauts sa Artemis II higayong mulabay ang ilang spacecraft sa likod sa Buwan kon Moon sa Lunes sa gabii, mga alas 23:47 BST kon ugmang adlawa, oras sa Pilipinas.
Tungod sa posisyon sa Buwan, dili makalusot ang radio ug laser signals nga nagkonekta kanila sa mission control sa Houston.
Sulod sa mga 40 minutos, magpabilin nga walay contact ang upat ka astronauts samtang nagbiyahe sila sa kangitngit sa kawanangan.
Sumala ni pilot Victor Glover, kining higayona mahimong oportunidad alang sa kalibutan nga maghi-usa ug magpadala og mga pag-ampo ug maayong hunahuna alang sa ilang luwas nga pagbalik sa komunikasyon.
Madumdumang kapin 50 ka tuig na ang milabay dihang nasinati usab kini sa mga astronauts sa Apollo program kondiin pinakasikat niini si Michael Collins sa Apollo 11, nga nabilin sa command module samtang sila Neil Armstrong ug Buzz Aldrin naglakaw sa lunar surface.
Sulod sa 48 minutos, hingpit nga naputol ang contact ni Collins sa Earth ug sa iyang mga kauban, nga iyang gihulagway sa iyang memoir isip pagbati nga tinuod nga nag-inusara apan puno sa kalinaw ug kahilum.
Sa karon, gisubaybayan sa Goonhilly Earth Station sa Cornwall ang posisyon sa Orion capsule.
Sumala sa ilang chief technology officer nga si Matt Cosby, mao kini ang unang higayon nga nag-track sila og spacecraft nga adunay sakay nga tawo. Aminado siyang kabado sila higayong mawala ang signal, apan naglaum sila nga luwas ang crew ug mobalik ang komunikasyon.
Plano sa mga programa sama sa European Space Agency nga Moonlight nga maglunsad og network sa satellites palibot sa Buwan aron masiguro ang padayon nga komunikasyon bisan pa sa far side.
Samtang nagpadayon, gamiton sa Artemis crew ang blackout period alang sa lunar observation, pagkuha og mga hulagway, pagtuon sa geology sa Buwan, ug pagtan-aw sa katahum niini. Sa dihang mobalik na ang signal, gilauman nga magdala sila og makapahinganghang mga talan-awon gikan sa ilang makasaysayanong misyon.
