BUTUAN CITY – Padayon karun ang imbestigasyon sa natigayon nga ngilngig nga kremin sa may Vasquez Street, Barangay Washington, Surigao City kaganinang buntag diin napatay ang usa ka magtutudle samtang samdan usab ang duha ka minor-de-edad nga anak niini.
Naila ang suspetsado nga si Joseph Condolon Gemari, hingkod ang edad, minyo, residente sa Barangay Consolacion, Dapa, Surigao Del Norte kansa gipapuyo lang sa maong balay kauban ang iyang anak.
Base sa inisyal nga imbestigasyon, nahugyaw ang mga residente sa maong dapit human migawas sa balay nga nagkadugo ang 5-anyos og 9-anyos nga mga bata nga daling gidala sa ospital og anaa na sa luwas nga kahimtang. Sa pagresponde sa kapulisan, didto nadiskubrihan ang wala nay kinabuhi nga inahan sa mga bata nga si Clarence May Besario Sulima, 38-anyos, minyo, magtutudlo sa Surigao City Pilot School og residente sa maong dapit.
Naligo kini sa kaugalingong dugo human nakahiagum og mga samad dinunggaban lakip na sa le-og.
Sa kuha sa CCTV Camera, daling migawas ang suspek uban sa iyang anak nga lalaki pasado alas 6:11 sa buntag. Nadakpan ang suspek didto sa lungsod sa Dapa, Surigao Del Norte og nabawi ang mga gamit sa biktima.
Nasayran nga ang suspek, brother-in-law sa amiga sa biktima nga nakipuyo lang sa balay sa magtutudlo.
