BUTUAN CITY – Patay ang usa ka Land Transportation Office kon LTO-Caraga Regional law enforcer human nabanggaan samtang patabok sa may national Highway, sa P-4, Brgy. Sumilihon, ning siyudad sa Butuan kagahapon sa alas-4:40 sa kaadlawon.
Na-ila ang biktima nga si Rene Osenar Cenangote, 49-anyos, residente sa Purok 8, Brgy. Ambago, ning siyudad. Migawas sa imbestigasyon nga nagpahigayon og roadside inspection operation ang mga LTO regional law enforcers team ug dihang patabok na sa dalan ang biktima, nabanggaan kini sa usa ka kolor itom nga Toyota Land Cruiser SUV nga gimanihuan sa negosyanteng si Wenifredo Dagani Andrade Jr., 34-anyos, taga-Jabonga, Agusan del Norte.
Nasayrang padulong unta ang driver sa Ampayon ning siyudad gikan sa Cabadbaran City, Agusan del Norte apan wala na makalahos tungod sa maong hitabo.
