BUTUAN CITY – Lain na usab nga tribung Manobo ang gipatay sa mga rebeldeng New People’s Army kon NPA sa bukirang bahin sa Sitio Himat-e, Brgy. Cayale, Tago, Surigao del sur buntag kagahapong adlawa.
Sa pakighinabi sa Bombo Radyo Butuan, gipadayag ni Datu Rico Maca, ang Indigenous People’s Mandatory Representative kon IPMR sa San Miguel, Surigao del Sur, wala pa gani nalubong ang patay’ng lawas ni Omar Ignacio Engayas kinsa unang gipatay sa NPA niadtong mi-aging mga adlaw, lain na usab nga tribong Manobo ang wala’y kaluoy nga gipusil-patay sa maong walhong grupo.
Sigon ni Datu Maca wala siya’y makitang igong rason aron patyon sa walhong grupo sa ig-agaw niining si Pacquito ‘Akit’ Maca Badiang sanglit sibilyan lamang kini nga naningkamot nga mabuhi ang iyang mga anak.
Base sa ilang pakighinabi sa anak sa biktima, nasayrang samtang nagbaktas sila padulong sa bukid gikan sa sentro aron unta magtanom og abaca, kalit lang gipusil sa 4 ka armadong tawo si Badiang sa nagkada-iyang parte sa lawas resulta sa kamatayon niini.
Nasayran pa niya nga dugay nang gipangita ug gi-atangan-atangan ang biktima sugod pa niadtong bulan sa Pebrero.
Nagpatabang na usab sila sa mga otoridad alang sa imbestigasyon sa maong insidente.
