BUTUAN CITY – Gitaho ni Alexis Cabardo, tigpamaba sa probinsiyal nga panggamhanan sa Agusan Del Sur nga miabot na sa 3.2 milyones pesos ang damyos sa imprastraktura samtang 91 milyones pesos usab sa livestock og agriculture tungod sa pagbaha sa Agusan Del Sur nga hatud sa walay hunong nga pag-ulan tungod sa shearline.
Sigon ni Cabardo nga 38 ka barangay ang apektado sa pagbaha diin 6,560 ka pamilya usab o 26,687 ka indibidwal ang na-apektuhan.
Sa maong ihap, 7,700 ka indibidwal ang mihikling ngadto sa evacuation center.
Hangtud sa pagkutlo ning balita duna pa gihapoy nagpabilin sa mga evacuation center bisan og duna nay mga paghubas sa baha.
Kini tungod kay gilauman pa gihapon ang dakong bul-og sa tubig nga gikan sa Davao De Oro og Davao Oriental agi sa Agusan River.
Hinoon gipaneguro ni Cabardo nga dunay mga gi-prepositioned nang food packs. Gipanawagan nalang niini ngadto sa mga katawhan sa Agusan Del Sur nga mag-amping sa kanunay.
