BUTUAN CITY – Tungod sa kawala’y kwarta aron mapa-check upsa espesyalista ang iyang pito ka buwang anak nga lalaki, nagpakitabang na lamang sa Bombo Radyo Butuan ang usa ka inahan aron lang ma-check up ang iyang anak nga si Jellsie Kate ug maresitahan og tambal sa iyang gihambin nga sakit sa dugo.
Sa eksklusibong pakighinabi ning sibyahan, gibutyag ni Jasmin Labador, residente sa Brgy. Jaguimitan, Nasipit, Agusan del Norte, sa pagkatawo pa lang sa iyang anak, gipahibalo na sila sa taga-Agusan del Norte Provincial Hospital nga duna’y sakit sa dugo ang bata human gipa-ilalom sa newborn screening.
Wala matud pa’y komunikasyong mi-abot kanila aron unta masayran ang sunod nilang himuon hangtud nga namatikdan nilang pag-abot sa bata og duha ka semana, duna na’y pula sa iyang aping nga nag-anam kadako hangtud nga mi-abot na sa wa-it. Duna matud pa’y higayon nga magdugo kini nga musangpot sa pagpunay na lang og dede sa bata higayong bati-on og kasakit.
Alayon niini nanuktok siya sa mga duna’y malumo nga kasing-kasing nga tabangan silang mapatambalan ang iyang anak gumikan sa kawala nila’y kwartang magamit sa pagpa-check up.
Ila nang napasusi sa mga pediatricians ang iyang anak apan gitambagan siyang muduol og espesyalista. Bugtong nilang babag karon mao ang kawala’y kwartang magamit tungod kay bisan pamiliti maglisod pa gani sila.
Tungod niini, nanawgan siya sa tana nga unta matunulan sila bisan og ginagmay lang nga tabang.
Dihang gipa-abot kini nga problema ngadto sa provincial hospital, gi-eskedyol gilayon ang check-up niini karong Lunes sa buntag aron madali kini sa pagpatambal.
Aron usab matubag ang ilang problema sa plitihan, duna na’y pipila ka mga bu-utang lungsuranong mi-pledge og cash assistance alang kanila.
Nasayrang gawas sa iyang anak, duna usa’y breast cancer ang iyang inahan nga nagpasamot karon sa gibug-aton sa iyang gipas-ang problema. Tungod kay wala’y mahimo igo na lang matud pa siyang muhilak rason nga wala siya’y mahimo tungod sa kapobrehon.
