BUTUAN CITY – Gilauman sa Philippine Coast Guard (PCG) nga mu-abot sa dili moubos sa tulo ka milyon ka mga pasahero ang mudagsa sa mga pantalan sa tibuok nasud alang sa pagsugod sa Semana Santa.
Sumala ni PCG Spokesperson Commodore Noemi Cayabyab, halos pareho kini sa gidaghanon sa mga pasahero nga natala sa mi-aging tuig sa samang panahon.
Base sa ilang kasamtangang datos, nakatala na sila og hapit 390,000 ka mga inbound ug outbound nga mga pasahero sa tanang pantalan sa nasud ug gila-umang madugangan pa tungod kay mas mudagsa pa ang mga pasahero sa Huwebes ug Biyernes Santo nga gideklarar nga regular holidays, samtang ang Sabado de Gloria gideklara nga special non-working holiday.
Dugang pa ni Cayabyab, nakaplastar na ang ilang mga tawo nga nagpokos sa paghatag og seguridad sa mga pasahero, paghimo og security patrols sa mga pantalan, ug paghatag og tabang sa search and rescue mission kon kinahanglan.
Mu-abot matud pa sa kapin sa 17,000 nga mga sakop sa PCG ang gipangkatag sa tibuok nasud aron masiguro ang maritime safety ug security taliwala sa gilauman nga daghang tawo karong semana.
Samtang, gawas pa niini, mas gipakusgan pa sa PCG ang pag-inspeksyon sa mga barko aron malikayan ang mga aksidente ug trahedya samtang nagbiyahe.
